Friday, May 22, 2009

Binutsoy

A Bisaya short story fragment I never finished. Found it while I was cleaning up my files. Posting here just to record it.

Gadagan si Terry padulung sa kahera diin galinya iyang Mama. Duul na kini mahuman pagtala sa kontador sa tanan nilang gipangpalit. Gakuut sa iyang pitaka ang iyang Mama. Maayo gani kay naabtan ni niya.

"Ma, kadali lang. Naa pa koy ipadugang." Ug iyang gibutang sa counter ang usa ka plastik nga supot nga kandila.

"Mag-unsa man ka ana, 'day?" pangutana sa iyang Mama. "Mura'g sayo ra man na, wala pa may Nobyembre karon."

"Dili, Ma! Para ni sa Earth Hour unyang gabii. Pampagngun daw nato atong mga suga gikan 8:30 hanggtud 9:30."

"Ha? Unsa na pud nang kabuang?"

"Kinahanglan man gud mapahibalo sa tanan ang impact sa Global Warming." Mao ni ang natunan ni Terry sa iyang pagsige ug tan'aw sa MTV. Sukad pa atong usa ka semana, balik-balik na ug pasalida ang mga mantalaan bahin sa Earth Hour. Ang mga gadasig mo-ambit kay si Jericho Rosales ug uban pang batan'ong artista.

"Sige gud uy!" Nipanghupaw ang Mama ni Terry. Gustong makiglabot ang iyang anak sa daghang suliran sa kalibutan. Si Terry pirmi mo-apil sa mga rally bahin sa ambientalismo, dili mukaon ug karne, ug daku ug kalagot sa mga gasul'ob ug balahibo sa mananap (maski na wala sila'y nakit'an nga gasul'ob ani.) Wala'y kapuslanan makipaglalis kaniya, ug gamuro na ang kahera ug ang mga tawong gasunod nila.

"Ma'am, gusto mo mopalit ug among Green Bag?" pangutana sa kahera. Ang Green Bag, usa ka baga nga panaptong sako, berde giyod tinuod pinauyon sa iyang pangalan.

"Ayaw lang, 'day. Mahal man kaayo."

"Ma, mas environment-friendly baya na kay sa mga plastic shopping bag."

"Hoy, Terry, tag-P35 baya na! Nipalit na ta ana atong usa ka semana. Nganong wala man nimo gidala?"

"Ay, gigamit man gud nako sa iskwelahan. Nakalimtan nako."

Sa ilang likod, nagpahibalo na sa iyang kahasol ang gasunod nila pinaagi sa pagughad. Nagdali-dali ug bayad ang Mama ni Terry bago na'ay laing mahunahunaan ang iyang anak.

"Hala, mamauli na ta!" ingon sa Mama ni Terry.

"Ayaw sa Ma, uy! Wala pa man siguro mobalik ang kuryente sa ato-a! Perteng gilas-a ra ba didto sa ato-a, abi nako mora na ko ug malanay. Magsuroy-suroy ug pabugnaw sa ta dinhi sa mall."




No comments:

Post a Comment